Шолц го разреши министерот за финансии, Кристијан Линднер, по што Слободната демократска партија најави дека ќе ги повлече сите свои министри од сојузната германска влада, а со тоа таа ќе остане без парламентарното мнозинство. Германскиот претседател Франк Валтер Штајнмаер, вчера, рече дека е подготвен да распише нови избори, кои Шолц ги предлага за крајот на март идната година, а опозицијата пред крајот на годинава. Во меѓувреме економијата продолжува да тоне и во третиот квартал, а министерот за економија Роберт Хабек најави дека годинава очекуваат пад на БДП од 0,2 отсто, со што продолжува негативниот тренд од минатата година
Економски ослабнатата Германија ја стресе и политичка криза. Се распаѓа коалицијата на канцеларот Олаф Шолц, откако во средата беше разрешен министерот за финансии, Кристијан Линднер. По неговото разрешување Слободната демократска партија (ФДП) најави дека ќе ги повлече сите свои министри од сојузната германска влада, а со тоа таа ќе остане без парламентарното мнозинство.
Германскиот претседател Франк Валтер Штајнмаер вчера рече дека е подготвен да распише нови избори посочувајќи дека крајот на една коалиција не е крај на светот.
-Тоа е политичка криза која мораме да ја надминеме. Нашата демократија е силна, но сега не е време за тактики и измами, туку за разум и одговорност, рече Штајнмаер, додавајќи дека на Германија и е потребно стабилно мнозинство и способна Влада.
Но, германскиот претседател има овластување да го распушти парламентот и да распише нови избори само под услов на Владата да и се изгласа недоверба, така што сега во фокусот на германската политика е тоа гласање.
Шолц предложи гласање за доверба на 15 јануари, со што нови избори би можеле да се одржат на крајот на март 2025 година, а на местото на разрешениот министер за финансии Линднер го предложи својот човек од доверба, поранешниот инвестициски банкар од Голдман Сакс, Јерг Кукис.
Шолц мора веднаш да побара гласање, а не да го чека јануари, одговори лидерот на германските опозициски конзервативци (ЦДУ), Фридрих Мерц.
-Коалицијата веќе нема мнозинство во германскиот Бундестаг (долниот дом на парламентот) и затоа мора да апелираме на канцеларот веднаш да побара гласање за доверба, најдоцна до почетокот на наредната недела, рече тој, пренесе Тагешау.
Во тој случај претседателот би можел да ги закаже изборите во рок од 21 ден.
Мерц исто така најави дека неговата партија е подготвена за разговори и да преземеме одговорност за Германија „и во овој случај“.
Како причина за разрешување на министерот за финансии Шолц го наведе незадоволството од неговата работа и рече дека работел за своите клиенти во партијата. Линднер, пак, му забележа на Шолц дека нема доволно лидерска сила и дека води погрешна економска политика. Меѓу другото, минатиот месец Линднер не се согласи со министерот за економија дека на автомобилските гиганти кои се во криза треба финансиски да им се помогне.
Според „Дојче Веле“ лидерите на владејачките партии – СПД, Зелените и ФДП претходно два ипол часа разговарале како коалицијата да излезе од кризата, во чиј центар е дефицитот од милијарди евра во нацрт-буџетот и како економијата да се извади од тешката ситуација.
По распадот на владејачката коалиција во Германија, се исцртуваат контурите на црвено-зелена малцинска влада во Берлин. Во владата на Шолц покрај разрешениот Линднер ФДП има уште три министри, кои ги покриваат ресорите правда, образование и сообраќај. Министерот за транспорт Фолкер Висинг рече дека сака да си ја задржи функцијата и покрај тоа што неговата ФДП ја напушти владата. Тој најави дека би си заминал од ФДП.
Владејачката коалиција составена од СПД, ФДП и Зелените се распаѓа по три тешки години владеење, меѓу другото и поради војната во Украина, рекордната инфлација и рецесијата. Германската економија е во тешка криза, а енергетскиот шок предизвикан од руската интервенција во Украина доведе до најголем пад на животниот стандард во земјата од Втората светска војна и пад на производството, што наликува на финансиската криза од 2008 година, пишува весникот „Гардијан“. Прелиминарните податоци од германската статистичка организација Дестатис, покажуваат дека економијата продолжува да тоне и во третиот квартал. Германскиот министер за економија Роберт Хабек најави дека годинава очекуваат пад на БДП од 0,2 отсто, со што продолжува негативниот тренд од минатата година.
Сликата на најсилната европска економија е до толку променета, што во опасна криза е и автомобилскиот гигант „Фолксваген“, кој затвора фабрики, отпушта работници и намалува плати. Како што пренесе „Ројтерс“ минатиот месец заврши со серија штрајкови на германските работници во електротехничката им металуршката индустрија, кои бараа зголемување на платите. Штрајкуваа вработените во „Порше“, „Мерцедес“ и „БМВ“.
