Васко Саздовски, научник од Македонија, загина во петокот во Нови Сад, кога се урна бетонска настрешница од зградата на железничката станица. Саздовски работеше една година во Институтот BioSens во Нови Сад, каде што се занимаваше со истражување и развој на информатички технологии за земјоделство.
Секој викенд се враќаше дома во Македонија, каде што живееја неговата сопруга и двете деца. Со тажни зборови од четириесет и петгодишниот научник се простија и колеги од Институтот BioSens.
– Колективот на Институтот BioSens изразува најдлабоко сочувство до семејството на нашиот трагично загинат колега Васко Саздовски. Изгубивме голем човек, исклучителен колега и соработник, одличен стручњак, еден од луѓето кои го направија светот подобро место. Институтот BioSens сочувствува со болката на најблиските на сите жртви во трагедијата во Нови Сад. Почивај во мир – напишале од компанијата во која работел.
Четиринаесет лица загинаа, а тројца се повредени при уривање на настрешницата на Железничката станица во Нови Сад.
