Кривична пријава е поднесена против тројца осомничени за крвничкото претепување на бездомното куче Феликс во кругот на фирма во индустриската зона Момин Поток, објави „А1он“. Инцидентот, кој се случи во ноември, ја шокираше јавноста откако се појави снимка на која се гледа како вработен брутално го претепува кучето со метална шипка.
Кучето, кое подоцна го доби името Феликс, вчера угина во стационарот на ЈП „Лајка“, месец и половина по инцидентот.
Од МВР информираат дека пријавата е поднесена за кривичното дело „мачење животни“ според член 233 од Кривичниот законик, за кое е предвидена парична казна или затвор до шест месеци.
„СВР Скопје до Основното јавно обвинителство Скопје поднесе кривична пријава против Љ.К. (61), Б.Б. (64) и З.Д. (74), сите од Скопје. За дополнителни информации, обратете се до ОЈО Скопје,“ изјавија од МВР.
Според неофицијални информации, кучето било нападнато откако извршило нужда пред складиштето на фирмата. И покрај бројните пријави за слични случаи, досега во земјава нема осудителна затворска пресуда за „мачење животни“.
