Образованието за нас е приоритет и не може да има силна држава без силно образование, истакна претседателот на македонската Влада, Христијан Мицкоски прашан во врска со изградбата на Факултетот за физичка култура и ФИНКИ во Скопје.
Според премиерот Мицкоси, изградбата на инфраструктура за високото образование е многу значајна и кога се вложува во високото образование секогаш се добива.
-Идејното решение на објектите ќе го определат студентите и тие во соработка со проектантите ќе го дадат конечното решение без разлика на стилот што ќе биде избран. Но мене ме загрижува тоа што во оваа учебна 2024-2025 година матурирале околу 14.000 матуранти. Недостасуваат млади луѓе и затоа потребна е нова парадигма и да знаеме каде сакаме да бидеме после 10 или 15 години, да се гледа визионерски без разлика на кој универзитет се студира. Зградите ќе ги изградиме, но се плашам да не нема луѓе за студирање. Не е се политика и желба за власт, треба да гледаме визионерски за тоа каде треба да стигнеме. Младите треба да се прашаат и да кажат каде ќе се најдат по 18 години…ние како Влада размислуваме за овој голем и сеопфатен процес кој треба заеднички да се креира, нагласи Мицкоски.
Пратеникот Бојан Стојановски праша и за состојбите во енергетскиот сектор, тема која според премиерот Христијан Мицкоски е светска тема, а не само локална или регионална.
-Без енергетска независност и стабилност ние неможеме да ја развиваме државата бидејќи нема да можеме да обезбедиме ресурс за развој на економијата. Во ЕСМ наследивме околу 5 милијарди денари долгови, наследивме хаос во МЕПСО и наследивме тендер за гасниот интерконектор со Грција за кој што постоеше опасност да биде откажан за финансирање од страна на европските кредитодаватели. Но, со нашиот ангажман со изградба на јужниот и северниот гасен интерконектор за енергија стануваме фактор во регионот. Во Битола го консолидиравме снабдувањето со јаглен, цената на електричната енергија остана иста иако секаде во регионот е зголемена и стандардот на граѓаните ни е пред се и над се, посочи Мицкоски и јавно побара од опозициската СДСМ да учествува на најавената дебата за квалитетот на воздухот во градот Скопје.
На пратеничкото прашање од пратеникот Бојан Стојановски во врска со странските директни инвестиции во земјава, премиерот рече дека Македонија ќе биде земја со најголем број на странски инвестиции по глава на жител во Европа.
– Од мај до ноември имаме 120 милиони евра месечно инвестиции. Очекувам во февруари Македонија да биде земја со најголем број на странски инвестиции по глава на жител во Европа. Нешто што одамна не сме биле, се сеќавате бевме на дното. И ова ни е многу важно, затоа што во пресметката на БДП во услови на криза во автомобилската индустрија и намалено индустриско производство, во услови на намалена побарувачка на суровини од нашите рудници, странските инвестиции, туризмот, услугите и земјоделието се тие кои што треба да го покријат тој недостаток, односно таа разлика која што ќе се случува во БДП, истакна Мицкоски и најави дека во месец јуни со инвестицијата на Алказар Енерџи ќе се стави камен темелник на ветерниот парк во вредност од половина милијарда долари.
