Одличните резултати кои ги надминаа очекувањата беа засенети од нешто послабите изгледи во тековниот квартал.
Компанијата објави рекорден квартален приход од 39,3 милијарди долари во фискалниот четврти квартал кој заврши на 26 јануари, што е за 12 отсто повеќе од третиот квартал и 78 отсто повеќе од истиот квартал во 2024 година. Приходите во сегментот на основните центри за податоци пораснаа за 16 отсто квартално и 93 отсто на годишно ниво, се додава во соопштението.
Извршниот директор на компанијата, Џенсен Хуанг, изјави дека побарувачката за новите чипови Блеквел е „неверојатна“ и дека вештачката интелигенција „напредува со брзина на светлината“.
Компанијата очекува да забележи приход од 43 милијарди долари во тековниот фискален прв квартал, додека аналитичарите во просек очекуваат 42,3 милијарди долари, а некои проекции споменуваат дури 48 милијарди долари. Прогнозата за првиот фискален квартал подразбира раст на приходите на годишно ниво од 65 отсто, значително помал од истиот период лани кога изнесуваше 262 отсто. Блумберг објави дека кварталните резултати на компанијата се „добри, но не и одлични“, бидејќи инвеститорите се навикнати на астрономски раст кој сега малку забавува.
Инвеститорите се прашуваат дали преминувањето кон чиповите на Блеквел дополнително ќе го забави растот, бидејќи новата технологија носи потенцијални производствени предизвици, додава њујоршката агенција.
