Клубот на извозници, Националниот совет за извоз и Институтот за извоз ќе претставуваат столб на Комората во наредните 10 години. Од Владата бараме и се усогласуваме да ја ставиме политиката на страна од економијата и да се занимаваме со економските прашања кои треба да и донесат напредок на земјата и раст на БДП од над 3 отсто, порача претседателот на Стопанската комора и на Националниот совет за извоз, Бранко Азески на денешната седница на Клубот на извозници при Стопанската комора.
На седницата, на која беа присутни и министерот за земјоделство, шумарство и водостопанство, Цветан Трипуновски и директорот на Царинската управа (ЦУ), Бобан Николовски, се зборуваше за активностите на Царинската управа за олеснување на трговските процедури, мерките за поддршка на конкурентноста и промоцијата на извозот на компании од земјоделско-прехранбениот сектор, како и за стратегијата за поддршка на извозните компании за периодот од 2024 до 2028 година.
Министерот Трипуновски истакна дека се поразителни бројките колку како држава трошиме за увоз на храна и дека од година во година се полоши и полоши. Интенција на Министерството е, додаде, да се зголеми производството, да бидеме отворени и транспарентни и со олеснета бирократија која може да биде и фрустрирачка во некој дел. Затоа, посочи, ќе работиме на делот на дигитализација за олеснување на бирократските процедури.
-Сепак за првите 10 месеци од годинава има одредени сегменти каде бележиме раст како држава и во делот на извозот на храна има зголемување за 11 проценти, кај пијалаците за 4,5, а во делот на тутунот и тутунските производи за 15 проценти. Во вкупна бројка за 10 месеци имаме извоз од околу 670 милиони евра, рече Трипуновски.
Тоа, како што кажа, е добар сигнал и почнуваат да се гледаат показателите дека Владата добро работи во овие шест месеци.
Земјоделско-прехранбениот сектор е значајна извозна гранка со огромен извозен потенцијал и преку заедничка соработка на приватниот и јавниот сектор треба да работиме во насока на искористување на тој потенцијал, истакна проф. д-р Дарко Лазаров, претседател на Клубот на извозници. Тој посочи дека извозната промоција со цел поголема видливост и препознатливост на нашите компании и производи на странските пазари е клучна за успех и тука Клубот на извозници заедно со надлежните државни институции ќе работи во наредниот период.
-Континуираниот дијалог и соработка на ЦУ со бизнис заедницата е основа за исполнување за нашите стратешки приоритети – зајакната економска конкурентност и економска трансформација на државата и борба со корупцијата и криминалот. Во овие насоки спроведени се конкретни мерки кои ќе придонесат за градење на демократска и конкурентна држава, нагласи Николовски.
Се работи, додаде, и на понатамошна дигитализација на царинското работење и усогласување со системите во ЕУ.
