Владејачката партија „Грузиски сон“ победи на парламентарните избори против проевропската опозициска коалиција, која во текот на ноќта одби да го признае поразот, соопшти утрово Централната изборна комисија на Грузија.
Партијата „Грузиски сон“, предводена од милијардерот Бидзина Иванишвили, освои 54,08 отсто од гласовите наспроти 37,58 отсто за проевропската коалиција, врз основа на 99 отсто од преброените изборни единици, изјави претседателот на Централната изборна комисија, Ѓорѓи Каландаришвили на прес. конференција.
Во текот на ноќта опозицијата одби да го признае поразот. Таа смета дека ваквите резултати ќе ја оддалечат земјата од влезот во Европската унија (ЕУ) и ќе ја доближат до Русија.
„Не ги признаваме лажните резултати од украдените избори“, изјави синоќа за новинарите Тина Бакучева, шеф на Обединетото национално движење, една од четирите партии во опозициската коалиција.
Опозицијата обвинува дека Грузискиот сон, кој е на власт од 2012 година, е авторитарна и проруска партија и дека ја оддалечува земјата од ЕУ и НАТО, на кои „има аспирации да се приклучи“.
Извршниот секретар на „Грузиски сон“ Мамука Мдинарадзе синоќа изјави дека резултатите што ги објави Централната изборна комисија покажуваат дека партијата обезбедила „солидно мнозинство“ во новиот парламент.
Владата пред изборите изјави дека сака да обезбеди три четвртини од местата во парламентот, кои се неопходни за измена на Уставот, а со тоа, како што планира, да ги забрани прозападните опозициски партии, пишува Франс прес.
Брисел предупреди дека шансите на Грузија за приклучување кон ЕУ ќе зависат од овие избори. Грузија во својот Устав напиша дека сака да влезе во ЕУ.
Изборите, кои беа надгледувани од меѓународни набљудувачи, беа обележани со неколку инциденти, емитувани на интернет, како тепачка на избирачко место во Тбилиси или тепачки во опозициското Обединето национално движење.
