Авион на компанијата „Рајанер“ на летот од Лондон до Осиек поминал околу 20 минути кружејќи на небото над Славонија, откако се појавил проблем со неговиот прием на аеродромот, пренесуваат хрватските медиуми. Како причина за овој несреќен инцидент се посочува доцнењето на вработен во Хрватската контрола на летање (HKZP), кој не стигнал навреме да ја започне својата смена.
Проблемот предизвикал сериозен застој во воздушниот простор, при што екипажот морал да ги примени вонредните процедури пред да добие дозвола да се приземји.
„За време на приемот на летот, имало кратко доцнење, но откако бил забележан проблемот, биле следени пропишаните процедури“, а авионот безбедно слетал на аеродромот во Осиек (OSI), објавува „Јутарњи лист“.
Според локалните медиуми, ситуацијата била дотолку сериозна што во еден момент била разгледувана и можноста за пренасочување на летот кон Будимпешта доколку не се воспостави комуникација. Од Хрватската контрола на летање тврдат дека безбедноста на патниците во ниту еден момент не била загрозена.
„Прелиминарната внатрешна проверка утврди дека причина за инцидентот е небрежност на поединечен вработен, имено неговото ненавремено пристигнување на смена“, сообшти Хрватската контрола на летање, додавајќи дека против вработениот ќе биде покрената дисциплинска постапка.
Податоците од јавните сервиси за следење на летови покажуваат дека авионот Боинг 737-800, кој во конфигурацијата на оваа компанија превезува до 189 патници, направил два круга во зоната на чекање на висина од околу 3.350 мери, по што слетал со минимално задоцнување.
Овој пропуст се случува во исклучително предизвикувачки период за аеродромот во Осиек. По прекинувањето на државната програма за субвенционирани домашни линии (PSO), аеродромот остана без летовите на „Trade Air“ кои сочинуваа повеќе од 40 отсто од вкупниот број патници во 2025 година. Во моментов таму се работи на инфраструктурен проект за проширување на патничкиот терминал вреден 14,3 милиони евра.
Хрватската јавност потсетува дека сличен инцидент со контролата на летање се случил и во 2008 година, кога авион со хрватската фудбалска репрезентација морал да го прекине слетувањето во Загреб бидејќи дежурниот контролор на кулата едноставно заспал на работното место и не одговарал на повиците на пилотите.
