Коалицијата ВРЕДИ синоќа на Конгрес во Скопје во присуство на 850 делегати се обедини во еден политички субјект.
Ко-претседателот на ВРЕДИ и градоначалник на Чаир Изет Меџити во изјава за медиуми истакна дека во албанскиот кампус имало монопол подолг период, гласачите барале промени и така се родила коалицијата ВРЕДИ.
-Гласачите бараа промени уште пред десетина години, но проблемот беше кај опозицијата. Ние тоа го прочитавме добро и се договоривме да се споиме како коалиција ВРЕДИ и од тој момент од опозиција, сега сме позиција и ги претставуваме Албанците во Македонија. По спектакуларната победа на локалните избори, каде победивме во 70 отсто од албанските општини, ние работевме, дебатиравме за сите модели и на крајот одлучивме дека ова е најдобриот модел за ВРЕДИ, рече Меџити.
Ко-претседателот и градоначалник на Тетово Билал Касами истакна дека за првпат пет политички партии и неколку организации се соединуваат во еден субјект во една политичка партија. Рече дека ВРЕДИ не е само сојуз на партии, туку друга култура на креирање политики.
-ВРЕДИ треба да стане уште една албанска политичка култура. Помирна, посериозна, поинституционална и поодговорна кон граѓанинот. Не ни е потребна политика што живее од кавги. На Албанците им е потребна политика што гради, планира и размислува надвор од мандатот. Затоа, важно е да кажеме и што претставуваме. Ние сме партија од десниот центар. И не го кажуваме ова како нешто што звучи добро на хартија. Го кажуваме затоа што веруваме во некои многу јасни вредности – рече тој.
Косовскиот премиер Албин Курти кој беше гостин на Конгресот во своето обраќање кажа дека овој Конгрес има единствена симболика токму затоа што се одржува на 9 мај, на Денот на Европа.
-Тоа е потсетник дека модерна Европа е изградена врз урнатините на фашизмот, супремацијата и војните. ЕУ е родена како проект на мир преку антифашизам и просперитет преку демократија. Ова е од особено значење за Балканот, рече тој.
