Еврокомесарката за проширување, Марта Кос, порача дека Македонија има историска можност да напредува на патот кон Европската Унија, но нагласи дека тоа ќе зависи од исполнувањето на преземените обврски и градењето доверба со земјите-членки.
Во интервју за МИА, Кос истакна дека земјава покажала силни резултати во спроведувањето на Реформската агенда, што, според неа, е доказ дека може да испорачува резултати кога постои политичка волја.
„Северна Македонија покажа дека може да постигне резултати кога има политичка волја. Тоа јасно се гледа преку нејзините силни перформанси во рамките на Реформската агенда. Доаѓам во Македонија за да ја охрабрам Владата истото да го направи и во процесот на пристапните преговори. Сега имаме можност што се случува еднаш во генерација“, изјави Кос.
Таа предупреди дека земјите кои ги исполнуваат своите обврски напредуваат кон членство, посочувајќи ги Црна Гора и Албанија како примери, додека оние што не го прават тоа ризикуваат да останат зад другите.
„Оние кои ги исполнуваат своите обврски напредуваат. Оние што не ги исполнуваат, заостануваат. Во период кога процесот на проширување се забрзува, застојот практично значи назадување“, рече еврокомесарката.
Според Кос, клучен предуслов за напредок во пристапните преговори е меѓусебната доверба меѓу земјите кандидати и земјите-членки на Европската Унија.
„Таквата доверба се гради пред сè преку исполнување на обврските и односот на земјите кандидати кон Европската Унија и нејзините членки. Таа започнува со добрососедските односи. Кога довербата расте, процесот на пристапување станува посигурен. Убедена сум дека тоа може да биде случај и со Македонија“, истакна Кос.
Осврнувајќи се на барањата за гаранции дека во текот на пристапниот процес нема да се појават нови билатерални спорови, Кос нагласи дека таква практика досега не постоела.
„Ниту една земја кандидат досега не добила гаранција дека нема да се појави нов спор во текот на пристапниот процес, сè до ратификацијата на Договорот за пристапување од страна на последната од 27-те земји-членки. Така функционира процесот на проширување на Европската Унија и важно е да се прифати таа реалност“, порача еврокомесарката Марта Кос.
