Министерот за надворешни работи Тимчо Муцунски реагираше на изјавите на неговата бугарска колешка Велислава Петрова Чамова, појаснувајќи дека меѓу нив немало официјална билатерална средба за време на денешните активности во Брисел.
„Во однос на изјавата на мојата нова бугарска колешка, би сакал да појаснам дека денес немавме официјална билатерална средба. Имавме кратка размена на зборови на маргините на настан, во присуство на повеќе колеги. Ако едноминутен разговор се нарекува ‘средба’, тогаш денес навистина имавме многу ‘средби’“, напиша Муцунски на социјалните мрежи.
Неговата реакција следува откако бугарската министерка изјави дека со Муцунски имала „добра прва средба“ и повтори дека Скопје треба да се придржува до договореното со Европската унија во 2022 година, вклучително и уставните измени за внесување на Бугарите во македонскиот Устав.
Муцунски реагираше и на употребата на терминот „северномакедонски“ од страна на бугарската министерка.
„Би сакал да потсетам дека користењето на терминот ‘северномакедонски’ за означување на македонскиот народ е неточно и несоодветно. Македонците се Македонци. Ова не е прашање на политика, туку на основно почитување на идентитетот и достоинството на еден народ“, истакна тој.
Шефот на македонската дипломатија нагласи дека прецизноста во дипломатската комуникација претставува израз на меѓусебна почит.
„Во дипломатијата, прецизноста не е формалност. Таа е одраз на почит“, порача Муцунски.
Тој додаде дека очекува наскоро да има вистинска средба со бугарската министерка, во, како што наведе, „пријателска и позитивна атмосфера“, насочена кон добрососедски односи и заедничката европска иднина.
