Министерот за економија, Бесар Дурмиши, денеска уште еднаш ги „олади“ синдикатите со барањето за зголемување на минималната плата велејќи дека нема да има вонредно зголемување на „минималецот“, туку дека ќе се чека редовното усогласување во март идната година. Дурмиши потсети дека минималната плата годинава се зголеми за околу 2.000 денари
Според Законот за минимална плата, усогласувањето, кое се врши еднаш годишно, се прави врз основа на растот на трошоците за живот, растот на просечната плата во државата, и продуктивноста на економијата.
Дурмиши смета дека доколку се подлегне на притисокот од синдикатите, таквата одлука ќе изврши притисок на малите и на средните претпријатија, кои ќе немаат финансиски средства да ги платат вработените, но ќе влијае и на инфлацијата.
Министерот зѐа економија не е загрижен и инфлацијата која во октомври достигна 4,5 отсто на годишно ниво. Тој очекува таа да се намали до крајот на годината.
Не гледа ниту причина да има мерки, односно да се интервенира врз малопродажните цените.
„За сега не гледам причина за донесување одлука за замрзнување или ограничување на бруто-профитната маржа во трговија на големо или во трговијата на мало, како што го направивме минатата година. Ги анализираме цените и пазарот секојдневно. Ако има потреба ќе донесеме одлука“, рече Дурмиши.
Тој најави дека до крајот на месецот ќе го свика Економско социјалниот совет на кој ќе се прецизираат и владините просечни потрошувачки кошнички.
Наместо мерки или зголемување на минималната плата, Дурмиши најави повисоки плати и повеќе работни места преку новите мерки за инвестиции.
Со усвојувањето на измените на Законот за финансиска поддршка на инвестициите во август годинава и со дополнителните измени што ќе се финализираат до крајот на годината, се создава стабилна, јасна и транспарентна рамка која ќе овозможи поквалитетни инвестиции, отворање на нови работни места и зголемување на продуктивноста во економијата.
Како што соопштија од Министерствот за економија, новите законски измени ќе придонесат кон забрзан економски раст и повисок животен стандард за граѓаните, што значи повисоки плати и пониска инфлација.
„Нашата цел е преку новите мерки да поттикнеме инвестиции со поголема додадена вредност – инвестиции кои ќе ја развиваат производствената индустрија, ќе воведат нови технологии и иновации и ќе создаваат одржливи работни места“, велат од Министерството за економија и труд.
Законот прецизно ги дефинира субјектите кои можат да користат финансиска поддршка – тоа се компании кои реализираат почетна инвестиција од најмалку 100.000 евра, во рамки на преработувачката индустрија.
