Млада жена од Македонија е пронајдена мртва во стан во областа Неаполи во Солун, откако нејзиното семејство со денови не можело да стапи во контакт со неа. Според грчките медиуми, близок роднина заминал до станот во кој престојувала и ја пронашол без знаци на живот, по што веднаш биле известени полицијата и надлежните служби. Првичните наоди од обдукцијата не покажале траги што би упатувале на кривично дело.
Грчкиот медиум „Тестивал“ објави дека, според досегашните судско-медицински наоди, смртта најверојатно се должи на патолошки причини. Надлежните органи сè уште ги очекуваат резултатите од токсиколошките анализи, кои треба да дадат дополнителни информации и да ја потврдат точната причина за смртта.
Девојката била пријавена за исчезната откако нејзините родители не можеле да ја добијат. По безуспешните обиди да стапат во контакт со неа, роднина отишол во станот во Неаполи, каде ја пронашол почината.
Според грчките извештаи, на местото бил повикан судски лекар. Од макроскопскиот преглед на телото и од досега собраните информации, не биле утврдени знаци што би укажувале на насилна смрт или криминално дело.
Случајот сè уште се истражува, а надлежните ги проверуваат сите околности поврзани со смртта на младата жена. Точната причина ќе биде позната по завршување на дополнителните анализи.
Во дел од македонските медиуми се појави неофицијална информација дека девојката била од Прилеп, но тоа засега не е официјално потврдено.
