Од денес започнува обврската за зимска опрема во нашите возила. Па за да бидеме 100% сигурни, еве што значи тоа.
Како и секогаш, и оваа година остануваме поборници за користење на зимска опрема, особено зимски пневматици. Веќе неколку пати сме дискутирале за тоа дали само две зимски гуми се доволни (секако дека не!), или пак дали погонот на сите четири тркала е доволна замена за зимските гуми (повторно – секако дека не!). Согласно законот за безбедност во сообраќајот, нашите возила мора да бидат опремени со соодветна зимска опрема.
Ако до пред неколку години зимската опрема беше задолжителна само надвор од населените места, веќе неколку години законот кажува дека морате да имате зимска опрема дури и ако не излегувате од град.
Под зимска опрема за вашето возило се подразбира:
Зимски пневматици на сите четири тркала со минимална длабочина на шарата од 4 милиметри или
Летни пневматици на сите четири тркала со минимална длабочина на шарата од 4 милиметри и во возилото да носите соодветни помагала (синџири за снег).
Не заборавајте дека синџирите за снег се поставуваат на погонските тркала.
Доколку вашето возило има погон на сите четири тркала, тогаш опремата е:
Зимски пневматици на сите четири тркала со минимална длабочина на шарата од 6 милиметри или
Летни пневматици на сите четири тркала со минимална длабочина на шарата од 4 милиметри и во возилото да носите соодветни синџири за снег.
Ако имаат постојан погон на четири тркала, синџирите се поставуваат на задната осовина.
Ако имаат преклоплив погон, тогаш синџирите се поставуваат најмалку на постојано вклучената осовина.
Повторно да нагласиме – доколку вашиот автомобил има погон само на две тркала, зимски пневматици само на погонските тркала ниту ги задоволуваат законските барања за зимска опрема, ниту пак ја препорачуваме оваа опција, бидејќи едноставно не е безбедна.
Имајте предвид дека зимски пневматици се оние кои имаат ознака „MS“, „M+S“, „M&S“ и знак на снегулка на стилизирана планина со три врва. Оние кои ја имаат само „М+S“ ознаката (или некоја нејзина варијанта) не ги задоволуваат стандардите за зимски пневматици, и не се сметаат за зимски пневматици – а со тоа не ги исполнуваат законските барања.
