Прекините на пазарот на нафта во последните денови сè повеќе ги погодуваат европските возачи, а сликите од бензинските пумпи во Словенија и Велика Британија покажуваат колку брзо стравот од недостиг може да се претвори во секојдневен хаос, објавува Еуроњуз.
Во Словенија, на некои пумпи им снема бензин, дизел и масло за греење, па граѓаните почнаа да се потпираат на апликацијата „Kje je goribo“ (Каде е горивото) за да не ги посетуваат станиците каде што резервоарите се веќе празни.
Во Велика Британија, иако властите повторуваат дека нема општи недостатоци, на социјалните мрежи се појавија снимки од наводно долги редици и панично купување, што покажува дека голем дел од јавноста не им верува на пораките.
Во Словенија, недостигот прво беше видлив преку повременото празнење на пумпите и долгите редици, особено по корекции на цените и зголемената побарувачка. Телевизијата 24ur известува дека имало ограничувања за полнење на неколку пумпи, дека возачите биле лути поради редовите и дека на некои места дури и горивото снемало, додека дополнителен притисок предизвикале и гужвите на пумпите по границата.
Во моментот кога започнуваат пролетните работи, словенечките земјоделци предупредија дека има недостиг од гориво за трактори и друга механизација на бројни пумпи.
Во позадина на сè е силниот раст на цените на енергијата на светскиот пазар. Ројтерс известува дека владите ширум светот воведуваат мерки за заштита на граѓаните од нагло зголемување на трошоците за енергија предизвикани од војната против Иран.
Во Велика Британија, според податоците објавени од Гардијан, повикувајќи се на RAC, цените на бензинот се зголемиле за околу девет проценти од почетокот на кризата, а дизелот за околу 17 проценти, со проценки дека просечната цена на литар бензин би можела да достигне 150 пени до Велигден.
