Лидерот на Демократскиот сојуз – Павле Трајанов во „Само вистина“ говорејќи за трнливиот европски пат на државава рече дека Македонија со децении била заложник на лажни политички догми.
Тој потсети на времето кога упорно се пласираше приказната дека патот до Брисел води исклучиво преку Охридскиот рамковен договор.
-Денес, според сите релевантни параметри, Македонија има одлична стратешка ориентација и е уверлив лидер по успешноста на реформите на терен. Нашиот реформски напредок е далеку пред оној на Албанија, Србија и Црна Гора – смета Трајанов
Трајанов беше дециден и притоа направи компарација со новите фаворити на Брисел, потенцирајќи дека е апсурдно Македонија да се споредува со земји како Молдавија и Украина.
Тој истакна дека во однос на институционалната подготвеност и усогласеноста со европското право, ние сме светлосни години понапред од нив.
Најголемиот проблем за нашиот европски застој, според лидерот на ДС, лежи во стратешките дипломатски пропусти.
Тој алармира дека Македонија низ годините не успеала да изгради цврсто и сигурно партнерство со земјите кои всушност ги носат главните политички одлуки во Брисел.
Клучот на нашиот успех се наоѓа во Берлин и Париз, како две најмоќни европски престолнини. За да се забрза процесот на интеграција, неопходно е зад нас да застане некоја од овие големи држави кои имаат моќ да ги скршат билатералните уцени. Дипломатскиот дефицит на претходните влади придонесе Македонија да остане сама на бришаниот простор, смета Трајанов.
