Агенцијата за електронски комуникации (АЕК) информира дека ги продолжи роковите од тендерската документацијата за трет мрежен оператор во државава, а на барање на единствениот понудувач на тендерот „Оне Македонија телекомуникации“ на унгарски „Фор-ај-џи“. Според Одлуката на АЕК, краен рок за донесување одлука за избор на најповолен понудувач сега е 12 јануари 2026 година, додека за доделување одобрение за користење на радиофреквенции рокот е 25 февруари 2026 година.
Како што посочуваат од АЕК, одлуката за продолжување на роковите е донесена на 21 ноември годинава, врз основа на молбата поднесена од „Оне Македонија Телекомуникации“ ДООЕЛ Скопје на 20 овој месец.
Понудите за тендерот беа отворени на 22 август годинава, кога Комисијата за спроведување на Јавниот тендер со јавно наддавање констатираше дека сите документи ги исполнуваат условите пропишани во тендерската документација и се согласно закон, но поради локалните избори, конечната одлука за избор на најповолниот понудувач беше одложена за по изборите.
