Албанија го доби првиот ултра богаташ кој е на најновата листа на Форбс за 2025 година на најбогати луѓе во светот.
Станува збор за Самир Мане основачот и сопственик на Нептун, чие богатство е проценето, според магазинот, на 1,4 милијарди долари. Неговото име за првпат се појавува на листата на ултра богати луѓе во светот.
„Албанија го има својот прв милијардер оваа година – Самир Мане, кој има изградено богатство од 1,4 милијарди долари од инвестиции во трговски центри, продавници за електроника и луксузни недвижности низ целиот Балкан. Тој е на 2.356-то место на листата на која се наоѓаат 3028 личности од светот, објавија медиумите.
Самир Мане е основач и претседател на „BALFIN Group“, инвестициски конгломерат со седиште во Тирана, Албанија. БАЛФИН поседува трговски центри и продавници за електроника и играчки на Западен Балкан, плус банка и луксузни недвижнини во Албанија.
Мане(58) избегал од албанскиот комунистички режим во 1991 година и се преселил во Австрија како бегалец; во 1993 година почнал да продава апарати за домаќинство во родната земја. Тој го лансираше „Нептун“, синџир на продавници за електроника, во Албанија во 1998 година и се врати во Албанија во 2005 година за да го отвори првиот трговски центар во земјата. „БАЛФИН“ поседува и недвижен имот во САД, Канада и Австрија, како и логистички паркови и приватен универзитет во Албанија.
Во Македонија групацијата „Балфин“, меѓу другото е позната и како инвеститор во „Ист Гејт“, еден од најголемите шопинг молови во регионот, вреден повеќе од 350 милиони евра. Покрај трговскиот центар, проектот содржи и станбен комплекс како и деловен простор.
Балфин претходно (во 2012 година) го изгради и „Скопје Сити Мол“, за подоцна во 2016 година да го продаде на Hystead од Велика Британија за 92 милиони евра.
САД, со рекордни 902 милијардери, се уште имаат повеќе милијардери од која било друга земја во светот. Кина со 516 (вклучувајќи го и Хонг Конг) останува втора, додека Индија со 205 милијардери и натаму е на третото место. Повеќе од 50% од сите милијардери се државјани на една од тие три земји, но вкупно 76 нации и две полу автономни територии имаат најмалку еден милијардер.
