Владата на Албанија продолжува со обемна операција за отстранување на бесправно изградени објекти, како дел од стратегијата за пристапување во ЕУ до 2030 година, а денес се започна со рушење на значајни градби.
Премиерот Еди Рама на социјалните медиуми објави видео од демолирањето на трокатна конструкција – дивоградба во туристичката зона Радим, во Валона, нарекувајќи го ова уште еден чекор во битката против беззаконието.
Во својата објава на Фејсбук, Рама истакнува дека „справувањето со градбата без дозволи или со непочитување на дозволите е мисија што ќе продолжи до крај, за заштита на јавните простори и запирање на обезличувањето на заедничките простории“.
Топ Чанел извести дека: „Валона се разбуди овој понеделник наутро со експлозија на 32 килограми експлозив, со што државниот инспекторат за урбанизам, во соработка со Министерството за одбрана, инженерските сили и државната полиција, сруши трикатна зграда со армирано-бетонска конструкција во близина на патниот правец Валона-Орикум”.
Владината иницијатива “Урбана ренесанса 2,0”, како што претходно изјави Рама, има за цел елиминирање на нелегалните објекти и враќање на заземените јавни површини низ целата држава. Истата беше презентирана како витален чекор во подготовките за интеграција во Европската Унија до 2030 година.
Примарна цел на акцијата е креирање поубави, организирани и “поевропски” градови, како дел од сеопфатната реформа за просторно уредување и надзор.
Дејствијата за уривање веќе се имплементираат во Тирана, Скадар, Валона, Драч и други урбани, приморски и заштитени региони. Различни нелегални елементи се отстранети – стреи, тезги, огради кои го попречуваат пристапот до јавниот простор.
Владата исто така отвори и дигитална платформа “Мој јавен простор”, преку која граѓаните можат да алармираат за недозволена градба, узурпација на јавна површина или загадување. Рама редовно пласира видеа од акциите на социјалните мрежи, охрабрувајќи соработка помеѓу граѓаните, општините и деловната заедница.
Оваа кампања е дел од посеопфатни реформи во инфраструктурата, менаџирањето со отпад и водоснабдувањето.
Меѓу реакциите, најголемо внимание привлече уривањето на приближно 70 објекти во заштитеното подрачје Тет, каде што дел од јавноста реагираше на начините на извршување.
Според Рама “Урбана ренесанса 2,0” ќе биде дел од заложбите во неговиот четврти премиерски мандат, со поригорозни прописи, вклучувајќи конфискација на нелегално изградени објекти и формирање “црна листа” на инвеститори кои ги прекршуваат законите. Ослободените простори ќе бидат претворени во проекти на домашни и странски архитекти.
