Бројот на загинати во катастрофалниот земјотрес во Мјанмар се искачи на 1.644 лица, пренесоа светските агенции, повикувајќи се на информации од владејачката хунта во Мјанмар. Најмалку 139 лица се водат како исчезнати. Повредените се 3.408 луѓе. Овие бројки се очекува да се зголемат.
Продолжуваат операциите за пребарување и спасување во Мјанмар, особено во најголемите погодени градови – Мандалеј и главниот град Нејпидо. Спасувачки екипи и опрема веќе пристигнаа од други земји. Но, овој процес е отежнат поради штетите што земјотресот ги предизвика на аеродромската инфраструктура на двата града.
Сателитските снимки од компанијата Planet Labs PBC покажаа дека земјотресот ја уништил кулата за контрола на летање на аеродромот во Нејпидо. Сè уште не е јасно дали има повредени или загинати при уривањето на кулата.
Авионите со спасувачки тимови слетуваат на аеродромот во Јангон наместо директно во погодените Нејпидо и Мандалеј.
Во меѓувреме, спасувачите денеска извлекоа 30-годишна жена од урнатините на нејзината станбена зграда во Мандалеј, јавија агенциите. Жената е пренесена во болница. Таа била под урнатините 30 часа.
