Бугарската Фондација „Македонија“ најави дека в недела ќе ги блокира трите гранични премини помеѓу Бугарија и Македонија. Блокадата, како што соопштија од Фондацијата, е координирана со Министерството за внатрешни работи на Бугарија и ќе трае два часа, од 11 до 13 часот.
Целта на блокадата, како што посочуваат од Фондацијата во објава на Фејсбук, е на премиерот Христијан Мицкоски демонстративно да му се покаже дека не може да продолжи со прогонот на Бугарите во земјава, со нападите и, како што велат, со измислените судски пресуди против Бугарите.
„Дали сте подготвени демонстративно и мирно да ги блокираме трите гранични премини со Северна Македонија и да му покажеме на Мицкоски дека ова не може да продолжи и дека ќе реагираме на оваа агресија што Скопје ја врши врз нас! Да им покажеме на Мицкоски и на неговиот режим дека не можат да продолжат да им се потсмеваат на Бугарија и на бугарскиот народ!додаваат од Фондацијата „Македонија“ во објавата на Фејсбук.
Ова следува откако пред два дена беа опожарени две дипломатски возила на Амбасадата во Бугарија во Скопје – чин што оттаму го оценија како форма на тероризам. Целта на блокадата, како што додаваат од бугарската Фондација „Македонија“, не е попречување на граѓаните да ја поминуваат границата, туку да му се покаже на премиерот Мицкоски дека власта во Скопје не може да продолжи со репресиите.
Инаку, претседателот на бугарската Фондација „Македонија“, Виктор Стојанов, во октомври 2023 година доби забрана за влез во земјава на неодредено време. На Стојанов претходно му беше забранет влез во С Македонија во времетраење од една година и три месеци, по чиј истек се упатил кон Скопје, но на граница бил вратен назад бидејќи забраната му била продолжена на неодредено време.
