Министерството за надворешни работи на Бугарија соопшти дека заштитата на дипломатската комуникација е прашање од исклучителна важност и дека ги осудува сите постапки што претставуваат прекршување на меѓународно утврдените правила и практики во оваа област.
Реакцијата од Софија следува по изјавите на македонскиот премиер Христијан Мицкоски во врска со протечената дипломатска нота која се однесува на патувањето на неговото семејство во бугарскиот зимски центар Пампорово во јануари годинава.
Од бугарското Министерство за надворешни работи посочуваат дека документот кој се појави во јавноста се однесува на настани од 6 јануари 2026 година и дека сè уште се утврдуваат околностите под кои информацијата станала достапна надвор од институционалните канали.
„Како што веќе информиравме, нотата што беше дистрибуирана во јавноста се однесува на настани од 6 јануари 2026 година. Во тек е проверка за утврдување на сите факти и околности поврзани со обработката на документот во рамките на Министерството за надворешни работи“, наведуваат од бугарското МНР во изјава за бугарската државна новинска агенција БТА.
Ова не е прва реакција на официјална Софија по случајот. Пред неколку дена бугарското МНР негираше дека токму од нивните структури протекла информацијата за патувањето на семејството на Мицкоски. Тогаш од Министерството нагласија дека станува збор за настан кој се случил пред повеќе месеци и не може да се смета за непосредна закана за безбедноста на премиерот и неговото семејство.
Во меѓувреме, премиерот Мицкоски во интервју за Македонската радио-телевизија оцени дека низата случувања во изминатиот период не се случајни и ги поврза со, како што рече, организирана бугарска кампања насочена кон влијание во македонскиот политички простор.
Тој посочи дека зад одредени политички активности и јавни настапи стои поширок обид за промовирање позиции кои, според него, не се прифатливи за македонските граѓани. Мицкоски истакна дека не верува во случајности во политиката и дека најчесто зад ваквите настани стојат однапред планирани активности.
„Многу малку верувам во случајност во политиката. Ако нешто изгледа случајно, тоа најчесто значи дека некој друг однапред го испланирал“, изјави премиерот.
Случајот со протечената дипломатска нота предизвика реакции и во двете земји, а бугарските власти најавуваат дека по завршувањето на внатрешната проверка ќе бидат познати повеќе детали за тоа како документот се појавил во јавноста.
