Јужнокорејскиот претседател Ли Џе Mјунг ги повика граѓаните почесто да јадат надвор од дома како дел од иницијативата за зголемување на домашната потрошувачка, објави денеска неговиот кабинет.
Вчера Ли вечерал во ресторан во центарот на Сеул со членови на неговиот персонал во обид да им даде поддршка на малите ресторани и локалните трговци кои се соочуваат со пад на потрошувачката.
Лично се надевам дека граѓаните ќе ги посетат блиските ресторани за да ги поддржат овие бизниси, што пак ќе придонесе за заживување на локалната економија и ќе претставува чекор кон посветла иднина за Јужна Кореја“, напиша Ли на социјалните медиуми.
Повикот е во време кога земјата се подготвува да дистрибуира еднократна финансиска помош за сите граѓани од 21 јули со цел да ја поттикне потрошувачката.
Износот на помошта е речиси 100 евра по лице и варира во зависност од приходите на домаќинството.
Ли претходно им наложи на високите службеници да подготват мерки за максимизирање на ефектите од исплатата, што е дел од дополнителен буџет во рамките на поширок пакет економски стимулации.
