Ауди“ го откри ентериерот на својот претстоен врвен модел Q9 (Audi Q9)“, за којшто се тврди дека „поставува нов стандард за просторот и ексклузивноста“. Луксузниот теренец ќе биде целосно претставен на 29 јули, а ќе служи како индиректен наследник на седанот „A8“, чиешто производство прекина неодамна. Q9 ќе стане најголемиот и најлуксузен модел на германската компанија досега, а продажбата ќе почне подоцна оваа година.
Бидејќи Q9 е замислен како наследник на седанот, како луксузен бизнис-автомобил, неговиот основен фокус ќе биде на удобноста на задните седишта. Така, со првите објавени фотографии германскиот автопроизводител јасно ја посочува оваа намера, прикажувајќи пространа кабина и луксузни седишта. „Ауди“ ги наведува и другите одлики на Q9, како автоматското отворање и затворање на вратите, панорамски покрив од 1,5 кубни метри – со променлива транспарентност и луксузни материјали како што се влакна од алпака и напа-кожа. Исто така, има и два безжични полначи, како и држачи за чаши и за шише од еден литар. Во конфигурацијата, т.е. пакетот со шест седишта, се нуди и сет електронски приспособливи седишта со можности за греење и вентилирање.
Патниците на предните седишта, исто така, не се изоставени. Тие имаат на располагање три дигитални дисплеи – инструмент табла од 30 см, централен екран на допир од 37 см и дисплеј за совозачот од 26,5 см.
– Автомобилите долго време се многу повеќе од само средство за превоз; тие се подвижни простори за живеење за нашите клиенти. Висококвалитетните материјали, приспособливите седишта со индивидуално електрично приспособување во вториот ред и автоматските врати ја нагласуваат нашата посветеност на квалитетот на нашиот нов, голем теренец со полна големина – изјави извршниот директор на „Ауди“, Гернот Долнер.
„Ауди“ досега откри малку технички детали за моделот, но гласините говорат оти претстојниот Q9 ќе користи проширена верзија на „Премиум-платформата за согорување (Premium Platform Combustion – ППЦ)“ на матичната групација „Фолксваген“. Се очекува линијата мотори да вклучува 4,0-литарски двоен турбо-в8-бензински мотор за спортскиот „SQ9“.
Иако ќе се нуди ширум цел свет, Q9 е првенствено наменет за зголемување на продажбата на „Ауди“ на пазарите во САД, Кина и Блискиот Исток. Q9 ќе послужи и како основа за новиот водечки теренец на „Порше“, со внатрешно кодно име „K1“. Се очекува двата престижни модели да се произведуваат на истата производствена линија во Братислава, Словачка.
