Портпаролот на ВМРО-ДПМНЕ, Валентин Манасиевски, обвини дека СДСМ, Левица и ДУИ се согласни само во едно – да не биде донесен новиот Изборен законик.
Според него, заеднички именител на трите опозициски партии е, како што рече, стравот од пораз на следните избори.
„Единственото нешто за коешто се согласни СДС, Левица и ДУИ е да не се донесе Изборниот законик. Заедничко за овие три партии од опозицијата, освен блокадата на Изборниот законик, е стравот од поразот на следните избори“, изјави Манасиевски.
Тој оцени дека опозицијата создава конфузија во јавноста со различни образложенија за недонесувањето на Изборниот законик.
„Од таа причина, тие создаваат една какафонија во јавноста со неможноста да се донесе договор за консензус за носење на Изборниот законик и на тој начин креираат алиби за поразот на следните избори. Едните ќе речат дека не се вметнати препораките на ОБСЕ и ОДИХР, другите дека не добиле пари за рекламирање, третите пак ќе се жалат дека не се почитува волјата на граѓаните, иако губат три изборни циклуси по ред. Ова ќе бидат приказните кои ќе ги раскажуваат по поразот на следните избори“, рече Манасиевски.
Тој додаде дека, според ВМРО-ДПМНЕ, опозициските партии не се заинтересирани за реформи, туку за, како што наведе, нанесување штета на државата.
„Едноставно, граѓаните ја прочитаа коалицијата на СДС, Левица и ДУИ. Нив не ги интересираат реформи и закони, туку како повеќе да ѝ наштетат на државата со ваквиот однос. За нивна жал, Македонија повторно е признаена како лидер во регионот во спроведувањето на реформите, а тоа што не се носи Изборниот законик е само вина на СДС, Левица и ДУИ“, изјави Манасиевски.
