Првата дама на САД, Меланија Трамп, се појави рамо до рамо со хуманоиден робот на глобалниот технолошки самит во Белата куќа, привлекувајќи големо внимание кај присутните.
Настанот, кој се одржа во Вашингтон, собра претставници од десетици земји и водечки технолошки компании, а во еден момент роботот, развиен од технолошка компанија од Силициумската Долина, заедно со првата дама прошета по црвениот тепих пред гостите.
При пристигнувањето, Меланија Трамп се повлече и му препушти на роботот прв да им се обрати на присутните. Тој се претстави како хуманоид создаден во Соединетите Американски Држави, по што поздрави на 11 јазици, вклучително и на словенечки, мајчиниот јазик на првата дама. Публиката реагираше со аплауз, а роботот потоа се повлече од салата.
Во своето обраќање, Трамп истакна дека ова е прв ваков „гостин“ во Белата куќа, нагласувајќи ја важноста на технолошките иновации.
Самитот е дел од нејзината иницијатива за поттикнување на иднината преку технологија и образование, која има за цел да го унапреди користењето на современите технологии кај младите ширум светот. На настанот учествуваа претставници од повеќе од 30 земји, како и водечки компании од технолошката индустрија.
Меланија Трамп во своето излагање се осврна и на иднината на вештачката интелигенција, нагласувајќи дека таа ќе стане сè повеќе дел од секојдневниот живот.
„Нашиот свет се менува. Со помош на вештачката интелигенција, знаењето станува подостапно од кога било. Во иднина, таа ќе се пресели од уредите во хуманоидни системи кои ќе ни помагаат во секојдневието“, рече таа.
Како пример, првата дама го спомена и концептот на хуманоиден едукатор кој би овозможил персонализирано учење за секое дете.
Со овој настан, Белата куќа испрати јасна порака дека вештачката интелигенција и роботиката ќе имаат клучна улога во иднината на образованието и економијата.
