Најголемата змија која некогаш живеела на Земјата е откриена во рудник во Индија. Станува збор за видот „Vasuki indicus“, кој живеел пред околу 47 милиони години. Според најновите научни анализи, ова праисториско суштество достигнувало должина од приближно 11 до 15 метри – еднакво на најпознатата џиновска змија од праисторијата, Титанобоа.
Нејзиното името е добиено по митскиот крал на змиите во хинду традицијата, Васуки. Откритието е резултат на детална анализа на фосилизирани пршлени пронајдени во рудник за лигнит во Индија, каде истражувачите идентификувале 27 добро зачувани пршлени кои јасно укажуваат на присуство на огромен предатор од семејството на древни змии.
Во научната студија објавена во списанието „Сајентифик Репортс“ (Scientific Reports), се вели дека оваа змија била масивна, цврсто градена и најверојатно приспособена за живот како предатор од заседа. Се претпоставува дека имала цилиндрично и широко тело, слично на современите анаконди, но значително поголемо и помоќно. Според истражувачите, нејзината тежина и димензии ѝ овозможувале исклучително силен стисок, со кој можела да го совлада пленот без потреба од брзо движење.
Поради својата големина, научниците сметаат дека „Vasuki indicus“ најверојатно се движела бавно и користела стратегија на чекање. Наместо активно да го брка пленот, се претпоставува дека лежела во заседа и го напаѓала во вистински момент, по што го совладувала. Оваа стратегија е слична на онаа кај современите големи констрикторни змии, но во многу поекстремна форма.
Ова откритие има големо значење за палеонтологијата, бидејќи помага подобро да се разбере еволуцијата на големите влекачи. Истражувачите нагласуваат дека индискиот потконтинент во тоа време претставувал значајна средина за развој на големи животински видови, кои подоцна се прошириле и во други делови на светот, меѓу кои Африка и Европа.
Иако во тој регион денес не постојат ваков животни, откривањето на праисториската змија „Vasuki indicus“, служи како силен потсетник за тоа колку драматично различен бил животот на Земјата во далечната геолошка историја – кога екосистемите биле дом на џиновски предатори кои денес постојат само во фосилна форма.
