Антикорупцискиот тим на СДСМ (АКТ) денеска обвини дека фирми за кои тврди дека се блиски до ВМРО-ДПМНЕ добиле над два милиони евра преку договори со државни институции и јавни претпријатија.
Членот на Извршниот одбор на АКТ, Јон Фрчкоски, на прес-конференција рече дека компанијата „Маратон гроуп“, од доаѓањето на ВМРО-ДПМНЕ на власт, добила договори во вредност од над 1,5 милиони евра, главно од Државна лотарија и Државна видеолотарија за надворешно и внатрешно рекламирање на автобусите на ЈСП Скопје.
Според него, и покрај финансиските проблеми со кои се соочува ЈСП, компанијата „Маратон“ остварила значителен профит.
Фрчкоски тврди дека АКТ открил и поврзаност меѓу сопственикот на „Маратон“, Љупчо Костовски, и компанијата „С.И.А. Медиа ДООЕЛ Скопје“, чиј сопственик, како што рече, е поранешен негов деловен партнер.
Според СДСМ, и оваа компанија по промената на власта склучила договори во вредност од 458.875 евра.
Од АКТ понатаму тврдат дека трагата води до генералниот секретар на Владата, Игор Јанушев, потсетувајќи дека тој во 2017 година, како директор на ЈСП Скопје, потпишал десетгодишен договор со компанијата „Маратон“.
СДСМ обвинува дека со укинувањето на маркетинг-секторот во ЈСП било овозможено рекламниот простор на претпријатието да го користи приватната компанија, а актуелната власт, според партијата, продолжила да склучува договори со истите фирми.
Од Антикорупцискиот тим на СДСМ велат дека досега објавиле информации за, како што тврдат, скандали вредни околу 150 милиони евра и ја повикаа надлежните институции да ги испитаат нивните наводи. Од Владата и од посочените компании засега нема реакција на овие обвинувања.
