Бугарскиот државјанин Виктор Стојанов, претседател на фондацијата „Македонија“, е опфатен со кривична пријава за ширење расистички и ксенофобичен материјал по пат на компјутерски систем, дело казниво по член 394-г од Кривичниот законик.
Од Агенција за национална безбедност соопштија дека пријавата следува по претходно обезбедени информации за субверзивно-пропагандни активности насочени кон поттикнување етничка и национална омраза. Акцијата била спроведена во координација со Министерство за внатрешни работи на Северна Македонија и Основно јавно обвинителство Скопје.
Според Обвинителството, Стојанов преку посебно креирана страница на Фејсбук споделувал содржини со кои поттикнувал национална и етничка омраза и дискриминација. Во рамки на истрагата бил извршен претрес и бил одземен пропаганден материјал наменет за дистрибуција во земјава.
Надлежните институции најавија дека истрагата продолжува и дека ќе се преземат дополнителни мерки за утврдување на сите околности.
