ВМРО-ДПМНЕ реагираше на, како што наведуваат, обидите на СДСМ да ја прикаже усвоената Резолуција како неуставна и како акт што ја нарушува слободата на изразување, оценувајќи дека станува збор за свесно извртување на нејзината уставно-правна природа и за ширење паника во јавноста.
„Наводите на СДС дека усвоената Резолуција е неуставна и дека ја нарушува слободата на изразување претставуваат грубо неразбирање или свесна злоупотреба на уставно-правната природа на овој акт“, соопштуваат од ВМРО-ДПМНЕ.
Од партијата појаснуваат дека Резолуцијата е политички акт со декларативен карактер, преку кој Собранието изразува став и утврдува политички позиции, без да создава правни обврски.
„Резолуцијата не е закон, не е подзаконски акт и не создава општообврзувачки норми, ниту пак воведува забрани, санкции или ограничувања на права и слободи“, се наведува во соопштението.
Според ВМРО-ДПМНЕ, тврдењата дека со Резолуцијата се гуши слободата на говорот се правно неосновани.
„Слободата на изразување, гарантирана со Уставот, може да биде ограничена само со закон, под строго утврдени услови. Во конкретниот случај, не постои ниту законска интервенција, ниту правен механизам што би ја ограничил политичката активност или јавното изразување на СДС или на кој било друг политички субјект“, истакнуваат од партијата.
Во реакцијата се наведува дека Резолуцијата не забранува јавна дебата и не воведува цензура.
„Резолуцијата не забранува дебата, не забранува изнесување ставови и не воведува цензура. Осудата на дезинформации не претставува уставно-правна санкција, туку политичка оценка, што е целосно легитимно право на Собранието“, се наведува во соопштението.
Од ВМРО-ДПМНЕ дополнуваат дека уставната слобода на изразување не значи апсолутно право на ширење невистини и манипулации.
„Политичката критика е дозволена и заштитена; дезинформациската кампања не е уставна вредност, особено кога станува збор за прашања што ја засегаат јавната безбедност и општествената стабилност“, порачуваат од партијата.
Во продолжение, ВМРО-ДПМНЕ ја обвинува СДСМ за лицемерие, потсетувајќи на, како што наведуваат, одлуки од минатото поврзани со мигрантски аранжмани.
„Апсурдно е СДС да зборува за ‘уривање на правниот поредок’, кога токму тие во минатото носеа одлуки и склучуваа аранжмани поврзани со мигрантски центри без транспарентност и без јавна расправа“, се наведува во реакцијата.
Од партијата истакнуваат дека со Резолуцијата јасно е потврдено дека нема и нема да има мигрантски кампови, а најавите за обраќање до меѓународни институции не можат, како што велат, да ја сменат правната реалност.
„Резолуцијата е уставно дозволен политички акт, не задира во човековите права и не создава правни последици по слободата на говорот“, соопштуваат од ВМРО-ДПМНЕ.
На крајот, од партијата оценуваат дека СДСМ повторно избира паника наместо аргументи.
„Вистината е едноставна и правно чиста: Резолуцијата е уставна, а лагите за мигрантски кампови се политичка манипулација“, порачуваат од ВМРО-ДПМНЕ.
