На девизните пазари вредноста на доларот во однос на кошницата валути падна минатата недела, трет пат по ред, бидејќи американската валута и натаму е под притисок поради трговската војна меѓу САД и Кина.
Индексот на доларот, кој ја мери вредноста на американскиот долар во однос на шесте главни валути, падна за 0,6 отсто минатата недела на 99,23 поени, што е ново најниско ниво во последните три години.
Американската валута ослабе и во однос на јапонската за 0,9 отсто, па нејзината цена падна на 142,20 јени.
Падот на доларот трета недела по ред е резултат на тековната трговска војна меѓу САД и Кина.
Сепак, американскиот претседател Доналд Трамп минатата недела рече дека очекува трговски договор со Кина, но не даде детали.
Од друга страна, кинеското Министерство за надворешни работи соопшти дека Кина повеќе нема да обрнува внимание доколку САД продолжат да си играат со царинските бројки. Ова беше одговор на заканата на Вашингтон дека ќе ги зголеми реципрочните царини за увоз од Кина на вкупно 245 проценти поради неговите контрамерки.
И додека Вашингтон се фокусираше на тарифната војна, Кина воведе низа нетарифни рестриктивни мерки. Меѓу другото, во услужните индустрии, како што се финансиите, консалтингот и туризмот, во кои САД со години имаат голем трговски суфицит со Кина, велат аналитичарите.
„САД и Кина се заглавени во невидена и скапа игра на кукавичлук, и се чини дека ниту една страна не е подготвена да се повлече“, рече Тинг Лу, економист во Номура.
Покрај тоа, доларот е под притисок бидејќи се очекува слабеење на американската економија. Минатата недела, Џером Пауел, претседателот на американската централна банка, рече дека повисоките тарифи од очекуваните веројатно ќе значат повисока инфлација и побавен економски раст.
Банката на федерални резерви, истакна Пауел, ќе чека повеќе економски податоци пред да преземе какви било мерки за каматните стапки.
Ова ги ублажи шпекулациите дека централната банка наскоро ќе ги намали каматните стапки, иако Трамп повторно го повика Пауел да ги намали каматните стапки и се закани дека наскоро ќе го смени од фотелјата на ФЕД.
За разлика од ФЕД, Европската централна банка минатата недела ги намали клучните каматни стапки за 0,25 процентни поени, трет пат оваа година, за да ја поддржи економијата во ова време на неизвесност поради војната со царините.
