Градоначалникот на Општина Центар, Горан Герасимовски, ќе биде номиниран за нов потпретседател на СДСМ, соопшти лидерот на партијата Венко Филипче.
Номинацијата доаѓа откако Герасимовски освои втор градоначалнички мандат во Центар, една од ретките скопски општини во кои СДСМ успеа да ја задржи локалната власт.
„СДСМ дополнително се зајакнува“, порача Филипче, оценувајќи дека резултатите на Герасимовски, неговата работа на локално ниво и довербата што ја добил од граѓаните се причините поради кои ќе биде предложен за една од највисоките партиски функции.
Според Филипче, Герасимовски треба да внесе нов импулс во партиското раководство и да придонесе кон обединување на кадровските и организациските капацитети на СДСМ.
Со најавената номинација, Филипче испраќа порака дека во повисоките партиски структури ќе добијат простор функционери кои имаат директен изборен легитимитет и искуство во водењето локална самоуправа.
Герасимовски официјално го започна првиот мандат како градоначалник на Центар во ноември 2021 година, а во ноември 2025 година го доби уверението за уште еден четиригодишен мандат.
Тој е роден во 1982 година во Скопје. Според официјалната биографија на Општина Центар, по образование е социолог, магистер по менаџмент на човечки ресурси и доктор на науки. Пред да стане градоначалник работел во Државниот завод за статистика, во приватниот сектор и во Државниот завод за индустриска сопственост, каде бил заменик-директор, а потоа и директор.
