Американскиот претседател Доналд Трамп вчера повторно ја оживеа својата иницијатива САД да го преземат Гренланд, заканувајќи се дека ќе ги повлече сите американски вооружени сили од Европа, објави „Гардијан“.
Пристигнувајќи на самитот на НАТО во Анкара, Трамп исто така изјави дека неговата посветеност на одбраната на Европа била намалена поради политичките одлуки на европските лидери за имиграцијата и за енергетиката.
Осврнувајќи се повторно на претходниот спор, Трамп изјави дека несогласувањето околу сопственоста на Гренланд – кој е дел од Данска, земја членка на НАТО – го „повредило“ неговиот однос со воениот сојуз.
„Данска не троши пари за вистински да му помогне на Гренланд, но тоа е важен дел за САД и е опкружен со кинески и со руски бродови… Треба да биде под контрола на САД, а не на Данска. А тие не се согласија со тоа, и покрај сите пари што ги трошиме за да им помогнеме со Русија. Не мора да трошиме никакви пари; можеме да ги повлечеме сите наши војници од Европа бидејќи, како што веројатно забележавте, Европа е многу поинакво место отколку пред 20 години. Треба да бидат внимателни со имиграцијата и енергијата. Ако не внимаваат на тие две работи, повеќе нема да има Европа“, рече тој.
Како одговор, британската министерка за финансии, Рејчел Ривс, нагласи дека иднината на Гренланд „зависи од народот на Гренланд и од Данска, а не од американскиот претседател“.
Данската премиерка, Мете Фредериксен, цврсто се спротивстави на изјавата на Трамп, велејќи дека островот „не е на продажба“.
