Според Nova.rs, група српски граѓани на кои им беше забранет влез во Црна Гора планирале да организираат неколку собири во поддршка на Александар Вучиќ за време на неговиот престој во Тиват, со цел да создадат впечаток дека српскиот претседател ужива силна поддршка од граѓаните на Црна Гора.
Додека црногорската полиција наведува дека кај патниците биле пронајдени транспаренти со натпис „Србија победува“, комуникациски уреди и дека ги чекале два автобуси, изворите на Nova тврдат дека планот бил многу поконкретен.
Списокот на патници на чартер летот до кој дојде порталот Vijesti.me открива дека станува збор за лица, од кои некои се обвинети за тешки кривични дела. Опозициските медиуми и активисти во Србија со години ги опишуваат како лица блиски до режимот на Александар Вучиќ. Според јавно достапните информации, поголемиот дел од списокот е поврзан со ангажмани за потребите на СНС, вклучително и обезбедување партиски простории, организирање контрапротести и учество на митинзи. Некои од нив наводно биле користени од властите за замолчување на политичките неистомисленици на спортски арени и протести, како и за дистрибуција на партиски материјали и цртање графити.
Извор близок до безбедносните служби изјави дека меѓу депортираните е и Далибор Станојевиќ, познат како Бошке, кој медиумите го опишуваат како лице блиско до владејачката структура на СНС. Станојевиќ, кој работи како обезбедувач на белградски сплавови, беше споменат во медиумите за напад врз собраните граѓани со метална сајла за време на студентските протести минатата година.
Според Nova.rs, од неколку извори запознаени со организацијата на патувањето, групата што пристигнала од Белград со чартер лет требало да организира неколку „спонтани“ собири во поддршка на српскиот претседател Александар Вучиќ за време на самитот.
Според истите извори, планот вклучувал појавување на неколку локации во Тиват и околината, истакнување транспаренти, како и организирање поворки со факели и собири што ќе ѝ дадат впечаток на јавноста дека граѓаните на Црна Гора спонтано изразуваат поддршка за српскиот претседател.
Според нивните извори, целта не била само да се испрати порака до домашната јавност во Србија, туку и да се создаде слика пред меѓународните претставници кои учествуваат на самитот ЕУ-Западен Балкан дека Вучиќ ужива поддршка надвор од границите на Србија.
Според информациите до кои дојде Нова, сличен модел веќе е користен во некои градови во регионот, вклучително и во Македонија, каде што за време на претходните посети биле организирани настани со цел да се создаде впечаток за широка регионална поддршка за властите во Белград.
Затоа, тврдат изворите на Нова.рс, не е случајно што група од 87 лица пристигнала во Тиват точно два дена пред самитот, на кој требало да присуствува и претседателот на Србија.
Од особен интерес е фактот дека до ден денес не е објаснето кој го организирал чартер летот од Белград до Тиват, кој го финансирал патувањето или зошто два автобуси ги чекале патниците при слетувањето.
Овие прашања засега остануваат неодговорени, додека црногорската полиција тврди дека проценила дека групата претставува безбедносен ризик и затоа им забранила влез во земјата.
