Во рамки на теренските посети на општините насловени „Каде што срцето е дома“, премиерот Христијан Мицкоски заедно со министерот за локална самоуправа Златко Перински, министерот за култура и туризам Зоран Љутков и градоначалникот на Гази Баба Бобан Стефковски, изврши увид во почнатата реконструкција на Домот на Културата „11 Октомври“, лоциран во паркот во Ченто.
Домот ќе биде со површина од 1 000 метри квадратни и ќе има три нивоа, ќе биде енергетски ефикасeн и целосно инклузивен, со лифт и тоалети за лица со посебни потреби, како и со капацитет за 180 гледачи. Вкупната инвестиција е 84 240 000 денари, а средствата се обезбедени од првиот јавен повик на Владата за општините.
Ова е еден од четирите проекти кои ќе се реализираат во општина Гази Баба со средства од државниот буџет.
-Повеќе од четири децении ова место беше најцрната точка во општина Гази Баба во кое се вршеа и девијантни појави, а за помалку од 18 месеци од денес ќе прерасне во центар на културата. Изразувам благодарност за финансиската поддршка на инфраструктурни проекти во општините која е од историска важност и ќе донесе забрзан развој што ќе ги реши децениските проблеми на граѓаните, изјави Стефковски.
Според министерот Перински, повеќе од 40 години, скоро сите политички гарнитури ветуваа реконструкција и инвестиција за подобрување на условите во овој Дом, но, досега тоа, за жал, не се случи.
-Оваа Влада, преку првиот повик, успеа и овозможи средства за обнова на објектот, кое е култно место за жителите на Гази Баба. Сега, како резултат на нашата посветеност за поддршка на општините, како и посветеноста на градоначалникот Стефковски да ги детектира потребите на граѓаните и да аплицира на повикот, Домот на култура ќе стане центар на креативност и културни настани, место каде што ќе може да се собираат нашите деца, културни друштва и сите љубители на уметноста и културата. Оваа Влада со дела потврдува дека е вистински пријател на општините. Како и досега, така и од сега, ќе продолжиме да инвестира во проекти коишто се врз основа на потребите на граѓаните. Јас се надевам дека за многу кратко време, ова многу битно место за жителите од ова населено место, ќе прерасне во вистински храм на културата и заедно ќе се радуваме на многу убави настани, изјави Перински.
Премиерот Мицкоски напомена дека продолжува инвестирањето во проекти во општините и поддршката на капиталните инвестиции.
-Не очекува динамична пролет и реализација не само на проектите од првиот, туку и на оние од вториот јавен повик кои се финансираат со наша поддршка, потенцира премиерот.
Серијата посети на министерот за локална самоуправа Перински ќе продолжат и следните денови. Веќе се најавени средби со управата на Општина Чаир и локалните жители.
