Европската комисија ги повика земјите-членки на Европската Унија да бидат подготвени и координирано да дејствуваат за да се избегне недостиг на керозин во текот на претстојната летна сезона. Причината е зголемената ранливост на европскиот пазар на авионско гориво поради кризата на Блискиот Исток и неизвесноста околу Ормускиот Теснец.
Според препораките на Комисијата, достапноста и оперативниот капацитет на европскиот сектор за рафинирање на нафта треба да бидат максимално искористени за да се задоволи побарувачката, особено за авионско гориво. Брисел нагласува дека ЕУ увезува околу 40 проценти од керозинот што го троши, а околу половина од тој увоз минува низ Ормускиот Теснец, што ја прави Унијата дополнително чувствителна на евентуални нарушувања во тој коридор.
Комисијата бара земјите-членки тесно да ги координираат националните мерки поврзани со керозинот и дизелот, за да се избегне меѓусебно натпреварување што би можело дополнително да ги крене цените. Истовремено, се разгледуваат и нови правила за создавање или прераспределба на резерви на авионско гориво, бидејќи за разлика од другите нафтени деривати, во ЕУ досега немаше посебна обврска за минимални резерви токму за керозин.
Како дел од пакетот, Европската комисија најавува и воспоставување опсерваторија за горива, преку која ќе се следат производството, увозот, извозот и резервите на керозин и други транспортни горива. Целта е ЕУ побрзо да ги идентификува можните недостатоци и, ако биде потребно, поефикасно да реагира со насочени мерки.
Брисел смета и на зголемено домашно производство. Според проценките што ги пренесуваат европските институции, рафинериите во ЕУ можат да покријат околу 70 проценти од потрошувачката на керозин, па затоа Комисијата сака тие да работат со полн капацитет за време на кризата.
Во меѓувреме, во Германија веќе се отвори дебата за снабдувањето со авионско гориво. Но најновите информации што ги пренесува Ројтерс велат дека германската влада засега не гледа непосредна опасност од недостиг, иако внимателно ја следи состојбата.
