Европската комисија соопшти дека ќе ги брани трговските интереси на Европската Унија, откако американскиот претседател Доналд Трамп се закани дека ќе ги прекине трговските односи со Шпанија, поради одбивањето на Мадрид да им дозволи на САД да ги користат своите воени бази за напади врз Иран.
Извршното тело на ЕУ во средата соопшти дека ќе се погрижи интересите на Унијата да бидат целосно заштитени, откако Белата куќа се закани со прекин на трговските односи со Шпанија.
Комисијата ја изрази својата поддршка откако претседателот на САД, Доналд Трамп, остро го критикуваше Мадрид поради одбивањето да им дозволи на американските воени сили да ги користат шпанските бази за операции поврзани со Иран.
Говорејќи во Белата куќа во вторникот, Трамп ја нарече шпанската влада „ужасна“.
„Ќе ја прекинеме целата трговија. Не сакаме да имаме никаква врска со Шпанија“, изјави тој.
Како одговор, заменик-главниот портпарол на Европската комисија, Олоф Гил, изјави:
„Стоиме во целосна солидарност со сите земји членки и нивните граѓани и, преку нашата заедничка трговска политика, подготвени сме да реагираме доколку е потребно за да ги заштитиме интересите на ЕУ.“
Подоцна, потпретседателот на Европската комисија, Стефан Сежурне, изјави дека кога станува збор за трговската политика, „секојa закана кон една земја членка по дефиниција е закана кон Европската Унија“.
Франција исто така застана зад Брисел. Според извор од Елисејската палата, францускиот претседател Емануел Макрон во средата разговарал со шпанскиот премиер Педро Санчез за да изрази „европска солидарност како одговор на неодамнешните закани за економска принуда“.
Трамп ги даде своите изјави во Вашингтон во присуство на германскиот канцелар Фридрих Мерц, кој тогаш не реагираше, но подоцна изјави дека сака да избегне дополнително зголемување на тензиите.
Односите меѓу Трамп и Мадрид веќе беа затегнати, бидејќи Шпанија се спротивстави на барањата на американскиот претседател земјите членки на НАТО да ги зголемат трошоците за одбрана.
Одговорот на Европската комисија дополнително нагласува дека трговијата е една од клучните надлежности на ЕУ, област во која тензиите со Вашингтон се зголемија откако Трамп повторно дојде на власт во 2025 година.
„Трговијата меѓу Европската Унија и Соединетите Американски Држави е длабоко интегрирана и взаемно корисна“, додаде Гил. „Заштитата на овој однос, особено во време на глобални потреси, е поважна од кога било и е јасно во интерес на двете страни.“
Трговскиот договор меѓу ЕУ и САД, постигнат минатото лето, сè уште е замрзнат откако европратениците ја стопираа неговата примена по одлуката на Врховниот суд на САД во февруари, со која тарифите воведени во 2025 година беа прогласени за нелегални.
И покрај нерамноправните услови – 15% американски царини за европски производи наспроти 0% царини на ЕУ за американски индустриски производи – Европската комисија сè уште го смета договорот за корисен.
