Европската комисија одобрила продажба на нова инјекција на компанијата Gilead Sciences, која служи за превенција од ХИВ инфекција и се прима два пати годишно, соопшти компанијата денеска.
Инјекцијата, која Европската комисија ја одобри во јуни годинава, ќе се продава во Европа под името „yeytuo“. Покрај 27-те земји-членки на Европската унија, ќе биде достапна и во Норвешка, Лихтенштајн и на Исланд, јавува Ројтерс.
Gilead ќе преговара за цената и условите за надоместок со здравствените системи во секоја земја пред инјекцијата да биде пуштена во промет.
Компанијата информира дека одобрувањето во ЕУ било извршено преку забрзана постапка, а добиена е дополнителна година за заштита на пазарот.
Ленакaпавир, активната супстанца во инјекцијата, која се прима двапати годишно, е во процес на регулаторна ревизија во Австралија, Бразил, Канада, Јужноафриканска Република и Швајцарија, а Gilead ги подготвува и барањата за одобрување во Аргентина, Мексико и Перу.
Во САД, лекот под името „yeztugo“ исто така беше одобрен во јуни, а каталошката цена изнесува повеќе од 28.000 долари годишно.
Европската комисија одобри оваа терапија како предекспозициона профилактика (PrEP), со цел да се намали ризикот од сексуално пренослив ХИВ кај возрасни и адолесценти со повисок ризик од инфекција.
Ленакaпавир покажа речиси 100% ефикасност во превенцијата на ХИВ според големите испитувања спроведени минатата година, а Светската здравствена организација во јули го препорача како дополнителна опција за PrEP.
Gilead најави дека ќе продолжи со поднесување барања за одобрување во земјите со ниски и средни приходи, вклучувајќи приоритетни регистрации во 18 земји каде што живеат 70% од луѓето заразени со ХИВ.
Компанијата, во соработка со Глобалниот фонд за борба против сида, туберкулоза и маларија, планира да обезбеди ленакaпавир за до два милиони луѓе во земјите со ниски приходи во следните три години.
Извор: N1info.rs
