Нема потреба од повлекување на предлог-законот за високо образование, бидејќи секое негово одложување би било на штета на високото образование, студентите и младите во државата – изјави министерката за образование и наука Весна Јаневска, одговарајќи на новинарско прашање дали законското решение ќе се врати на доработка.
Таа посочи дека бројот на забелешки од универзитетите не е голем, при што дел од нив се повторуваат, а сите аргументирани и разумни предлози ќе бидат прифатени и вградени во текстот на законот, пренесе МИА.
Како пример, Јаневска наведе дека ќе се повлече одредбата според која кандидатите пред одбрана на магистерски труд треба да имаат објавено научен труд во базата Web of Science, бидејќи е оценето дека за тоа често нема доволно време. Исто така, наместо три научни труда со импакт-фактор за одбрана на докторска дисертација, ќе бидат доволни два.
Министерката информираше дека приватните универзитети доставиле забелешки во однос на висината на финансиската гаранција. Наместо предвидените 100 проценти, гаранцијата ќе се намали на 70 проценти, а како обезбедување ќе може да се понуди и хипотека.
Според неа, во одредени членови се потребни технички дообјаснувања, особено околу роковите за акредитација и постапките при нова акредитација, но без промена на суштината на законот. По дополнителните усогласувања, законот повторно ќе биде објавен на ЕНЕР, по што се очекува да влезе во владина процедура.
Во однос на студентите на приватните универзитети, Јаневска нагласи дека тие немаат причина за загриженост и ќе можат да ги завршат студиите според акредитацијата по која се запишале. Доколку сакаат, ќе им биде овозможено и префрлување на државни универзитети.
За професорите, министерката истакна дека вработувањето во приватниот сектор секогаш носи одредени ризици и додаде дека државата е должна да интервенира поради состојбите во високото образование и во интерес на младите и образовниот систем.
