„Овој проблем со Бугарија мене навистина некако ми личи на некаков дебатен договор. Ние кога воспитуваме дома дете го воспитуваме да ги завршува домашните задачи, а не да бара изговори како да ги избегне. Зошто го велам ова, затоа што претходниот собраниски состав веќе има изгласано заклучоци за црвените линии, јас секогаш си ги носам со себе, каде што јасно стои дека мора безусловно да се почитуваат јазичните, идентитетските, историските и културните особености на македонскиот народ како елементи за кои не се преговара со Европскјата унија. Какви повеќе црвени линии ни требаат кога го имаме ова“ вели Зајкова по однос на предлогот на лидерот на СДСМ за документ за национален консензус.
Прашана за тоа од каде сега идејата Филипче да излези со еден ваков предлог и дали смета дека ова ќе се провлекува во изборната кампања, Зајкова вели дека таа не е Филипче, дека не се СДСМ и имаат идеолошки разлики и дека не се ниту ВМРО ДПМНЕ.
„Добронамерно посакувам и премиерот да биде добар во интерес на државата и опозицијата да дејствува навистина опозиционо и да се наоѓаат решенија. ЛДП го кажа своето решение по однос на ова прашање, уставни измени со одложено дејство и не стапување на истите во сила додека Бугарија не го ратификува протоколот за членство на Македонија во Европската унија, но она што сега сметам дека е суштински, ќе се вратам на почетокот на вашите прашања дали ќе доминираат националните теми или локалните теми, мислам дека пред овие избори треба да се занимаваме со секојдневните потреби и проблеми на граѓаните, а не да излегуваме и да кажуваме разно-разни решенија колку да не се реши проблемот, затоа што веќе ви напоменав ние црвени линии имаме изгласано. Еднаш е гласана декларација во Собранието за црвените линиии, втор пат се гласани заклучоци по однос на тој предлог кој стигна од ЕУ со кои што јасно се гарантира дека за идентитетот и јазикот не може да се преговара“ вели Зајкова во интервју за Актуел на Тера телевизија.
