Цените на суровата нафта на светските пазари забележаа значителен пад откако се појавија информации дека иранската нафта наскоро би можела повторно да се врати на глобалниот пазар, поттикнувајќи очекувања за зголемена понуда и намалување на инфлациските притисоци.
Фјучерсите на нафтата Брент се спуштија под границата од 80 долари за барел, што претставува пад од повеќе од една третина во однос на претходните највисоки нивоа. Причина за ваквото движење се извештаите дека САД би можеле да ги ублажат или укинат санкциите за извоз на иранска нафта во рамки на договорот за ставање крај на конфликтот, пренесе „Гардијан“.
Пазарите позитивно реагираа на можноста за враќање на дополнителни количини нафта од Блискиот Исток, што ги зголеми очекувањата за стабилизирање на снабдувањето со енергенси на светско ниво.
Во исто време, падот на цените на нафтата придонесе за намалување на приносите на американските државни обврзници, додека глобалните пазари на обврзници забележаа раст, поттикнати од проценките дека инфлацијата би можела дополнително да се намали, пренесе „Ројтерс“.
Иако геополитичките тензии во изминатиот период создадоа неизвесност на енергетските пазари и влијаеја врз стратешките резерви на нафта, аналитичарите оценуваат дека евентуалното обновување на иранскиот извоз би можело да донесе дополнително олеснување и поголема стабилност на глобалниот енергетски пазар.
