Претседателот на Движењето ЗНАМ, Максим Димитриевски, во гостувањето во емисијата „Топ Тема“ на Телевизија Телма говореше за реализацијата на владината програма, улогата на партијата во извршната власт и клучните политички прашања.
Осврнувајќи се на причините поради кои ЗНАМ стана дел од владејачката коалиција, Димитриевски истакна дека главната цел била да се спречат негативните политички сценарија од минатото и да се обезбеди посилна застапеност на македонските национални интереси.
„ЗНАМ влезе во оваа коалиција за да не гледаме реприза на она што се случуваше во минатото. Нашите мотиви да влеземе во Владата беа Македонците повеќе да не се чувствуваат како граѓани од втор ред во сопствената држава“, нагласи Димитриевски.
Тој посочи дека неговата партија нема потпишано формален коалициски договор со ВМРО-ДПМНЕ и со коалицијата ВЛЕН, но по завршувањето на парламентарните избори била усогласена заедничка владина програма во која се вградени приоритетите на ЗНАМ.
Според него, министрите од нивните редови, Горан Минчев и Игор Филков, доследно ја реализираат зацртаната програма. Како потврда за тоа, Димитриевски ги посочи оценките од претседателот на Европскиот совет, Антонио Кошта, кој при посетата на Скопје го потенцирал напредокот во јавната администрација и владеењето на правото — ресори предводени токму од ЗНАМ.
Како едно од најзначајните прашања во изминатиот период, лидерот на ЗНАМ ја посочи непроменливоста на Уставот под услови на нови отстапки и повторно го афирмираше концептот на условени уставни измени.
„Нашиот став останува непроменет. Концептот на условени уставни измени е решение што ги штити националните интереси и обезбедува јасни гаранции за државата и граѓаните“, истакна претседателот на ЗНАМ.
На крајот од гостувањето, Димитриевски порача дека Движењето ЗНАМ ќе продолжи да делува како фактор на стабилност, реформи и заштита на државните и националните интереси, останувајќи доследен на ветувањата дадени пред граѓаните.
