Осум лица се осудени на затворски казни од 13,5 до 20 години за учество во најголемата заплена на наркотици во историјата на Ирска, јави ДПА.
Во септември 2023 година, ирската армија пронајде над 2,2 тона кокаин на бродот „Матју“, со вредност од 157 милиони евра.
Шестемина обвинети, уапсени на бродот, ја признале вината за поседување кокаин со намера за трговија, а уште двајца признале вина по нивно апсење на чамец со кој требало да се префрли дрогата.
Обвинетите се од различни држави – Холандија, Иран, Филипини, Украина и Велика Британија.
Ирската национална полиција соопшти дека овие пресуди се „јасна порака“ дека Ирска не е лесна цел за меѓународни криминални мрежи.
„За сите инволвирани во трговија со дрога, пораката е јасна: државата со целосен капацитет и меѓународна поддршка ви стои на патот. Ве очекуваат долги казни, заплена на имот и специјални истраги“, се наведува во соопштението.
