Министерот за транспорт Александар Николоски најави дека најдоцна до јуни годинава ќе биде пуштена железничка линија на релација Прилеп-Битола-Жабени. Повратна карта ќе чини 150 денари.
Николоски вели дека железничката линија се воведува за на граѓаните што имаат дневна потреба помеѓу овие два града, како и за оние што работат во индустриската зона Жабени, да им се овозможи брзо и навремено пристигнување, додека во меѓувреме трае изградбата на автопатот Прилеп-Битола.
„Свесни сме дека во моментов е отежната комуникацијата помеѓу Прилеп и Битола. Се користи стариот пат кој е со помал проток и за таа цел најдоцна до јуни ќе пуштиме меѓуградски воз кој би оперирал на линија Прилеп-Битола-Жабени за на тој начин да можат оние што имаат дневна потреба помеѓу овие два града, а и оние што работат во индустриската зона Жабени да го користат возот, што би значело навремено и брзо пристигнување“,рече Николоски по увидот на изградбата на автопатот Прилеп-Битола.
Министерот рече дека изградбата на автопатот Прилеп-Битола тече одлично. Според најавите на изведувачите, автопатската делница треба да биде готова пред рокот, кој е до крајот на 2029 година.
„Она што го добив како ветување од изведувачите е дека следната пролет ќе можеме да возиме по првите километри од автопатот Прилеп-Битола, а пред рокот да се заврши целиот автопат. Добив ветување дека пролетта 2029 година ќе има комплетно автопатско решение од Прилеп до Битола“,рече Николоски.
Министерот рече дека во текот на јуни или јули годинава се очекува да биде готово и конечното решение за продолжување со работата на патот после тунелите кај Фариш.
„Веќе го пуштивме експресниот пат од Градско до Дреново и од Дреново до Фариш. Сега треба да го завршиме делот од Фариш до Прилеп, односно да го решиме Плетвар и да имаме до Битола целосно автопатско решение“,додава министерот.
