Македонскиот воздушен простор ќе биде целосно затворен за сообраќај на 20 и 24 октомври, поради најавен штрајк на контролорите на летање, објави „24Инфо“, повикувајќи се на извори од синдикатот на Македонска навигација (М-НАВ).
Струковиот синдикат на контролори на летање (ССКЛМ) повторно ја активира одлуката за штрајк, откако, како што наведуваат, менаџментот на М-НАВ не ги исполнил претходно дадените ветувања. Според нив, состојбата во претпријатието задолжено за безбедноста во авиосообраќајот е загрижувачка, а неопходните кадровски решенија се одложуваат и блокираат.
Од извори на Синдикатот за 24Инфо велат дека 20 октомври е избран како почетен датум по завршувањето на локалните избори, за да не се дозволи на раководството на М-НАВ да ја искористи ситуацијата и да го етикетира штрајкот како политички мотивиран.
Контролорите бараат: Запирање на партиските вработувања во М-НАВ; Одобрување од Министерството за финансии за објавување на огласи за нови вработувања – пред сè за контролори на летање и инженери; Распишување тендер за избор на меѓународна независна агенција за изработка на функционална анализа на потребите на претпријатието.
