Денеска во кривичен суд продолжи судењето за убиствата на Вања Ѓорчевска и Панче Жежовски. Сведочеше Велибор Манев, кој одговараше на прашања на Палевски.
Манев рече дека Палевски ја одлепил сивата трака од устата на Вања, и потоа ја сликал со вперен пиштол.
„Откако ја уби, во сино ранче го спакува пиштолот, трите мотороли и нареди на свој послушник да го уништи пакетот“, рече Манев, кој кажа дека не го споменал досега овој момент, за да го заштити човекот кому му било наредено да го уништил пакетот.
– Палевски ја одлепи лентата од устата на Вања за да ја слика. Ја сликаше со пиштолот вперен во Вања, за родителите што побрзо да дадат пари – рече Манев.
Палчо потоа го праша колку луѓе го тепале во полициска станица, за да признае дека Александар е вмешан.
„Во првите 5-10 дена беше страшно, помислував да се самоубијам. Потоа се проретчи“, рече Манев.
Манев додаде дека е свесен дека направил голема грешка со тоа што го посочил Александар, под присила од ќотек, одговарајќи на прашање од адвокатот на Палевски, Јовица Страшевски.
Страшевски му посочи дека со лажниот исказ Манев ја загрозил истрагата.
– Значи вие посочивте лице кое не е виновно, а криевте друго лице, за кое велиtе дека ви било жал да ја поминува истата голгота? – рече Страшевски.
– Си нанесов душевна болка со тоа што го посочив Александар. Не ја попречува истрагата и не ѝ наштетив на истрагата. Многу жалам за тој исказ за Александар, кој беше изуден со ќотек – рече Манев.
