Министерството за здравство изразува сочувство до родителите на починатото новороденче на Клиниката за гинекологија и акушерство. Во врска со случајот, министерот Азир Алиу иницираше вонреден инспекциски надзор до Државниот санитарен и здравствен инспекторат, а потоа ќе следи и стручен надзор.
„Министерството за здравство заедно со инспекторатот ќе постапат професионално, стручно и транспарентно, со цел точно и објективно информирање на јавноста за околностите во овој случај и за преземените активности од стручен аспект“, стои во соопштението.
Јавноста и семејството се замолуваат да почекаат на наодите од надзорите и обдукцискиот наод, кој е единствен и конечен за утврдување на причините за смртта на новороденчето, за да не се создава немир пред добивање на конечните резултати.
Министерството истакнува дека Клиниката за гинекологија и акушерство е врвна терциерна установа со воспоставени законски пропишани протоколи за постапување во вакви случаи. Јавноста ќе биде навремено информирана веднаш по добивање на сите наоди.
