На прес-конференцијата пред мечот во Скопје против Белгија се обрати пред новинарите и селекторот Благоја Милевски. Предводникот на нашата репрезентација го најави дуелот и го коментира силниот ривал.
„Анализите се направени, не треба да се зборува за квалитетот на Белгија. Тие имаат многу квалитетни играчи, тоа е тим кој години наназад е во врвот на европскиот фудбал. Од друга страна, Македонија покажала дека знае да се бори и со такви тимови. Не гледам причина зошто да не е така и на утрешниот натпревар. Мора да сме на својот максимум, па ќе видиме што ќе ни донесе тоа. Овој јунски период години наназад ни е проблематичен. Што се однесува до сегашната ситуација, мора да го смениме тој менталитет индивидуално и како тим. Тоа што го видов изминатите седум дена ми дава за право да бидам оптимист дека овој јуни ќе биде поинаков. Менталитетот на играчите е поинаков отколку досега, атмосферата и енергијата се одлични. Без оглед на повредите, во текот на овие денови имаме дополнителни проблеми. Под знак прашалник се Алими, Димоски и Трапановски, но се надевам дека ќе бидат способни да заиграат. Се надевам дека на физички план ќе бидеме поподготвени од минатото
Несомнено дека индивидуалниот квалитет на Белгија е на највисоко можно ниво. Македонија, ако функционира како досега како тим, тоа е наша најдобра страна и квалитет. Само така можеме да се надеваме на позитивен резултат. Анализите се направени од двата натпревари со новиот селектор против Украина, само тие се веродостојни. Не мора да значи дека ќе изгледаат исто така и против нас. Подготвени сме на секое сценарио, да одговориме на предизвикот“, изјави Милевски.
Македонија ќе ја дочека Белгија в петок (20:45 часот), а веќе в понеденик ќе се судри со селекцијата на Казахстан во Астана.
