Зошто ни е неопходно подигнување на прагот за ДДВ?, пишува Кирил Миноски, екс министер за финансии.
Во продолжение ставот на Миноски.
Претприемачите, микро и малите компании се основниот двигател на економскиот развој. Во Македонија, микро компаниите учествуваат со околу 90,4 %, а малите со околу 7,4 % во вкупниот број претпријатија. Тоа значи дека над 97 % од сите фирми се микро и мали бизниси .
Кога зборуваме за даночната рамка, во Македонија обврската за регистрација за ДДВ започнува кога бизнисот ќе оствари повеќе од 2.000.000 денари годишен промет (околу €32.000). За споредба:
• Во Србија, прагот е околу €65.000.
• Во Хрватска, прагот е €60.000.
• Во Словенија, прагот е €60.000.
• Во Албанија, прагот е околу €80.000.
Ова значи дека во најголем дел од соседните земји и земјите членки на ЕУ прагот е двојно повисок, што им овозможува на микро и малите претпријатија поголем простор да растат без дополнителни административни и даночни обврски.
Една од клучните точки за градење конкурентно деловно опкружување е пристапот до финансии. Во услови кога нема систематизирана поддршка за стартапи и мали бизниси, подигнувањето на прагот за ДДВ ќе значи:
• намален притисок за користење краткорочни кредити за финансирање на тековното работење;
• повеќе простор за раст, формализација и акумулација на капитал и поголема ликвидност пред влез во сложен даночен режим (ДДВ се плаќа и кога фактурата не е наплатена)
• можност ослободените средства да се инвестираат во развој, иновативни производи и повисоки плати, што директно ќе ја зајакне економијата и ќе ја зголеми вработеноста.
Дали државата ќе изгуби приходи?
Преку поттикнување на инвестициите и растот на платите, државата ќе ги наплати даноците индиректно – преку повисоки социјални придонеси, персонален данок и зголемена потрошувачка како резултат на повисокиот промет. Воедно ќе се избегне даночното затајување и вештачко делење фирми и прикривање промет, а со е-фактура лесно ќе може да се идентификуваат неправилностите со повратот. Повисок праг ќе значи повеќе доброволна усогласеност и помал притисок врз УЈП.
Проблемот е што економските политики често ги креираат луѓе кои не ги разбираат реалните предизвици на малиот бизнис. Претприемништвото е основниот двигател на економијата, а микро и малите компании заслужуваат континуирана поддршка ако сакаме подинамичен приватен сектор, подобра економија и повисок животен стандард.
