Премиерот Христијан Мицкоски денеска истакна дека преку програмата Еразмус+, младите во Македонија имаат пристап до моќен европски финансиски инструмент кој овозможува меѓународна мобилност, учење и професионален развој.
Обраќајќи се на настанот во организација на Националната агенција за европски образовни програми и мобилност, одржан на Економскиот факултет при Универзитет Св. Кирил и Методиј, Мицкоски нагласи дека учеството на Македонија во програмата Еразмус+ како програмска земја обезбедува целосен и рамноправен пристап до сите активности, идентично како и земјите членки на Европската Унија.
„Ова не е симболична, туку суштинска европска интеграција преку образованието, младите и знаењето“, истакна премиерот.
Тој посочи дека за 2026 година е обезбеден најголемиот буџет досега во рамките на програмата, во вкупен износ од над 8 милиони евра, што, како што рече, претставува јасна определба државата да инвестира таму каде што приносот е најголем – кај младите.
Мицкоски се осврна и на значењето на Европската младинска картичка, која овозможува попусти и поволности за младите во 38 европски држави, оценувајќи дека таа, покрај практичните придобивки, создава чувство на припадност кон европската младинска заедница.
Младите не се само корисници на политики, туку активни чинители во општеството“, нагласи премиерот.
Според Мицкоски, Еразмус+ претставува клучен механизам и за студентите и за универзитетите, овозможувајќи студиски престои во странство, јакнење на институционалните капацитети, модернизација на наставата и активно вклучување во европски академски и истражувачки мрежи.
Тој ги посочи задржувањето на младите, активното граѓанство, социјалната инклузија и европската интеграција како клучни приоритети што се поврзуваат со програмата Еразмус+ и националните младински политики.
„Нашата визија е Македонија како држава што инвестира во младите, создава можности и гради европска иднина дома“, порача Мицкоски, изразувајќи уверување дека програмските приоритети за 2026 година ќе бидат чекор напред кон поактивни млади и посилни институции.
